numä äbä

zeintä

mis härz isch erstickt a däm schmärz, i luegä vorwärts u gseh numä rückwärts. säg, isches das wärt?

was wosch du vo mir? mir zwöi zämä, du liebsch mi vergäbä, ds cha nid verhäbä, vo wägä es brucht numä wiuä, am wöuä ligts nid. du fragsch hani di gärn? klar, i ha di gärner aus gärn u glich ischs mer lieber du blibsch mer chli färn. ab und zue rüefi nach dir, griifi nach dir, doch när wosch du grad aues vo mir, aber weisch, mir zwöi zämä, du liebsch mi vergäbä, ds cha nid verhäbä, werum chani dir so nid sägä, cha nüt machä dergägä, mir stöh eifach uf eigete wägä, o we mir irgendwie glich anang chläbä. mängisch möchti di scho gärn ä chli häbä, meh wüssä vo dir u dim läbä, numä äbä, mis härz isch erstickt a däm schmärz, i luege vorwärts u gseh numä rückwärts. säg, isches das wärt?

mou, o ig ha der troum vorä frou womi ufbout, mi abhout, mir aus avertrout u glich nüt verbout. mou, vou, sonä frou wär der troum, nur isches ä kampf mit mir innerä sou. scho paar mau hets mi zmitts iz härz inä troffä, ha zilet u gschossä iz offenä gou, ou … eigägou. so hanis scho mängisch verhout u si hei mer vergäbes vertrout, da druf bini nid stouz. nimmsch ds würklech i chouf? gloub mer, gschider wed abhousch statt dassd mir dini seelä verchoufsch, iz offnä mässer driloufsch.

klar, o ig ha da mängisch ä ahnig we du i mim arm ligsch, we du mir warm gisch. de dänki dasses doch wahr isch, dass da öppis da isch, dasses mi azieht we du mi amachsch u so warmhärzig alachsch. ach, was hani aues a dir? du bisch der wahnsinn u doch ergrift mi ä panik, si packt mi am gnick, bingt mer ä strick, es isch eifach verzwickt, wüu de dänki ah, gang, la mi la si, i cha nid für di da si. schad was für schadä i ging wieder arichtä weni dnöchi zu dir versuechä zvernichtä, sä grundlos zgrund richtä.

säg, bisch du morn glich no da, blibsch du no chli hiä stah? säg, wosch du der kampf mit mir ufnäh, chasch du no nid grad ufgäh? vilech bruchts nur chli geduud bisi merkä i bi nid tschuud. vilech bruchts nur chli vertrouä bisi dir gloubä, dass du mir gar nüt wosch näh u glich aues gäh. mir zwöi zämä, vilech liebsch mi nid ganz vergäbä, vilech chas glich no verhäbä? mängisch möchti di scho gärn ä chli häbä, meh wüssä vo dir u dim läbä, numä äbä, mis härz isch erstickt a däm schmärz, i luege vorwärts u gseh numä rückwärts. säg, isches das wärt?

 

zangerä

mis härz gspürt zgwicht vo dim schmärz, i losä zuä, ghörä di u sägä derzuä: i teilä di angscht u glich ischs das wärt.

i gseh du chasch zrueder nid us der hand gäh, derbi wotti dir dini freiheit nid wäg näh. du fragsch was wotti vor dir? aues u nüt, luä, i wott mini seelä dir uftuä, dir öppis guets tuä, das mit üs isch nüt womä eifach cha abtuä. ab und zuä gniessischs mit mir, machsch ders gmüetlech mit mir, doch gäh wosch mer nid meh vo dir. aber weisch, das mit üs isch nüt womä eifach cha abtuä. wi mängi chancä heimer zvertuä? mängisch hani o gnuä vo dinä plötzlechä luunä, da luegi u stuunä. winä muni bisch du am chrampfä zum di verschanzä. numä äbä, mis härz gspürt zgwicht vo dim schmärz, i losä zuä, ghörä di u sägä derzuä: i teilä di angscht u glich ischs das wärt.

mou, o ig ha scho eigägou gschossä, mi vergäbes verschossä. o du hesch mi früecher scho troffä, hesch dis härz mir churzum verschlossä. mehrmaus bini so scho versoffä u glich bini für di ging no offä. i gseh wi du di sehnsch, wid di nach öpperem usdehnsch, wi sehr du wettsch liebä u gliebt si, ä chli bisch verliebt iz verliebt si. i gseh aber o dini angscht, gspürä förmlech wid di verchrampfsch, wi dini gfüuh am bodä zerstampfsch, beobachtä än innerä kampf, verbrönnä mer dfinger a dir wi am heissischtä dampf.

klar, i ha nä ahnig wis i dir innä usgseht, i gspürä wi sech aus i dir wehrt. u glich isch da ä harmonie we mir üs nöch si, we mir im höch si, ä lisligi symphonie, ä schöni partie. wes passt, de passts, wes au üsi sinnä umfasst, de simer eifach zmitts drinnä, de ligt aues dinnä. mir chöi numä gwinnä, weimer däm würklech entrinnä? mir chönntä dnöchi zunang so eifach verdichtä, müesstä numä zguetä meh gwichtä, der turm nöi ufschichtä, de würd sech der räscht säuber richtä.

i loufä so schnäu nid dervo, ha der kampf lengscht scho ufgno. i la di wieder u wieder la zieh u wartä de hie. vilech bruchts nur ä chli zit bis du merksch es geit gar nid zwit. vilech bruchts nur ä chli muet bis es flämmli ufstigt us derä zaghaftä gluet, eis, wonis wermt u glich ke brand drus entsteit, wo kes band um nis leit. luä, i wott mini seelä dir uftuä, dir öppis guets tuä, das mit üs isch nüt womä eifach cha abtuä. mängisch hani o gnuä vo dinä plötzlechä luunä, numä äbä, mis härz gspürt zgwicht vo dim schmärz, i losä zuä, ghörä di u sägä derzuä: i teilä di angscht u glich ischs das wärt.

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s