E Schwaube macht no ke Summer, Teil II: Der Henä, dBeatrice u der Fridu

Der Henä

I weiss nid werum, aber i bi no mängisch i däm Lädeli ga Blueme choufe. I bi eigentlech nid der Typ gsy, wo uf serigs Wärt gleit heit u mi Frou het o so gwüsst, dasi se gliebt ha. Mir si scho lang zäme gsy, hei üs sit der Schuzyt kennt. Woni ihre ha afa der Hof mache, hare natürlech scho öppe mau es Strüssli bracht, aber die hani denn no säuber pflückt. Stutz hani ir Stifti ja nid gha. Hüt verdiene sech üser Lehrlinge nes guudigs Näsli u hocke ihrne Eutere glich ging uf der Täsche, das gsehni ja bi üsem Giu. Früecher heimer no richtig müesse chrämpfe für das Hüngerlöhndli womer denn gha hei. Aber item, es isch wies isch. Wo der Fridu mi denn i das Lädeli het mitgno zum üsere Muetter es Blüemli poschte, isch mer das e chli zwider gsy. „Muesi würklech mitcho?“ hani scho am Telefon gfragt. „Nüt, Henä, da chasch du di itz nid usewinde. Du chunnsch mit, lisisch es Blüemli us u mir bringere das zäme“, het der Fridu gseit u ke Widerred duudet. DMuetter isch denn im Lindehof gsy wägere Grippe u mi hets gnärvt, dass si scho wieder sone Sach drus het müesse mache. Si isch im Auter eifach es Mimöseli worde, het nüt meh möge verlide, derby het si doch sächs Ching uf dWäut bracht. Säubscht der Fridu mit sim grosse u sture Gring, het si schinbar mühelos u ohni viu Gmöögg us sech use presst. I ha nid chönne verstah wie sech öpper so het chönne verändere. Womer du vorem Bluemegschäft si gstange hani no einisch versuecht Widerstang zleischte, aber der Fridu het nüt wöue wüsse. So bini ihm de missmuetig hingenachetrötschgelet u ha nume mit de Schuutere zuckt woner uf zerschte Strüssli zeigt het. „Mir doch glych,“ hani gseit u dHäng i de Hoseseck vergrabe. Der Fridu het dOuge grout, het das Strüssli gno, mi am Ermu packt u mit sech zur Kasse zoge. Es isch aber niemer dört gsy u so heimer gwartet wie bsteut u nid abghout. Nach e paar Minute bini langsam ungeduudig worde. Grad woni am Fridu ha wöue vorschlah, mir chönnte doch eifach abhoue, isch du aber e jungi Frou usem Hingerzimmer cho u het sech i auer Form bi üs entschuudiget. U da ischs mir hurti e chli angers worde. I hätt nid rächt chönne säge werum, aber das Meitschi het mi närvös gmacht. Si het mir ganz diräkt id Ouge gluegt, het mi aglächlet u wes mer rächt isch, het si mir sogar zuezwinkeret womer üs verabschidet hei.

„Fridu, hesch dere ihri Ouge gseh?“ hani gfragt womer wieder im Outo si gsy, zStrüssli zwüsche mine Chnöi iklemmt. „Wäm?“ „Eh däm Meitschi im Lade.“ Wie immer het sech der Fridu umständlech agurtet u der Rückspiugu afa richte. „Spinnsch?“ heter haub abwäsend gfragt, „Die isch ja chum euter aus dSalome.“ „Was äch,“ hani abgwunke, „füfezwänzgi isch die scho.“ Da het der Fridu zu mir überegluegt u glachet. „Füfezwänzgi? U no wenn, die isch viu zjung für sone aute Päppu wie di.“ „Aute Päppu? I bi no nid emau sächzgi, nid so wie du.“ Der Fridu het natürlech Rächt gha. U glich bini beleidiget gsy.

                I hamer nid chönne häufe. Scho am nächschte Tag bini wieder id Länggass ufe gfahre, ha Blueme kouft u däm Meitschi id Ouge gluegt. Da het öppis gfunklet, öppis woni früecher i de Ouge vor Beatrice ha gseh. Womer no jung si gsy. U si het ihre gliche. Zersch hani gar nid meh wöue ussert mi fürne Momänt wieder e chli so füehle wie früecher. Zersch hani nume ne chli wöue flirte u luege wie si uf mi reagiert. Si het natürlech sofort gmerkt, dasi wäge ihre gäng wieder verby cho bi. U i ha genau gwüsst, dass si nume mitmer gspiut het. Mau het si mir Hoffnige gmacht, mau het si mi la zable. Si het mi ume Finger gwicklet u das nach aune Regle vor Kunscht. Passiert isch schlussamänd nid viu. Auso nid so viu. Guet, i mues zuegäh es isch meh passiert aus i mir erhofft ha oder aus der Fridu mir gloubt het. Verzeut hanis ussert ihm niemerem u i bi nächer o nie meh i däm Lädeli ga Blueme choufe.

Gschämt hani mi nie derfür, im Gägeteil, u fürnes schlächts Gwüsse het das woni mit däm Meitschi gha ha o nid glängt. Wenn überhoupt, de hani nume ne chline Gwüssensbiss gha u das o nume womi dBeatrice churz drufabe mau wieder gfragt het öbi ihre de ging no tröi sig u i nid ganz ehrlech bi gsy. Im Grosse und Ganze hani mit däm Sitesprüngli, u meh aus es Sprüngli isches auso würklech nid gsy, rächt guet chönne läbe. Zeinzige woni mi mängisch gfragt ha isch gsy wies äch däm Meitschi dermit isch gange. Si isch ja no so jung gsy. Vilech hätti när no mitere drüber söue rede. Vilech hätti glich no einisch söue verby gah oder zmingscht emau söue alüte. I ha se aber no ab und zue gseh, bim Komissione mache oder schüsch ir Stadt, u si het e zfridnige Idruck gmacht. Gfunklet hei ihri Ouge immerno, das hani o vo witem gseh, u di Giele wo aube mitere si ungerwägs gsy, hei sichtbar Müeh gha, sich nid dervo la iznäh. Nume hani se de o einisch gseh gränne. Es isch es paar Jahr speter gsy, wenn genau weisi nüm. Si isch ganz elei ufeme Bänkli uf der chlyne Schanze ghocket woni zuefäuig bi verby cho u het sech immer wieder dTräne mitem Handrügge abgwüscht. Si het gar nid versuecht se zungerdrücke. I hase rächt lang beobachtet, has aber nid härebracht zuere zgah. I ha no guet gwüsst wie sech es brochnigs Härz afüuht, o wes bi mir scho lang isch här gsy, dass mi öpper so verletzt het. Wäm o immer si denn nachetruuret het, es isch öpper gsy wo ihre sehr viu bedütet het. Was ou immer gnau isch passiert gsy, äs het öppis ganz töif i ihre inne kabutt gmacht. Das hani ihrne Ouge agseh. ZFunkle isch wäg gsy u i gloube denn hani zerschte Mau ihres wahre Wäse gseh. Si isch, u da bini mer denn plötzlech sicher gsy, e sehr verletzlechi u vilech sogar en unsicheri jungi Frou gsy. Gäh het si sech ganz angers, aber wieviu Lüt mache das nid? Wie mängisch spile mir nid angerne öppis vor, tüe derglyche oder säge es göng üs guet wes eigentlech nid eso isch? U wie mängisch füehle mir üs einsam wemer eigentlech vo ganz viune Lüt umgäh si u nis sötte gliebt füehle? Es isch nid immer aues so wies schint u woni se denn eso ha gseh, i ihrem Schmärz, het si mir ungloublech leid tah. Es paar Täg speter hani nes Seckli Bruchschoggi vom Läderach miteme Briefli vor ihri Ladetür gleit. „Säubscht we du muesch briegge,“ hani gschribe, „bisch du ne wunderschöni Frou. Schoggi richtet zwar nüt, aber aus Seeletröschter tougter aui Mau. Merci für aues, Heinz.“ I bi sicher gsy, si wärd no wüsse wäri sig u wose znächschte Mau ir Stadt gseh ha, hani ihre zuegwunke. Si het glächlet u mir es Luftmüntschi zuegschickt. ZFunkle i ihrne Ouge isch zwar noni ganz zrügg gsy, aber i bi sicher gsy, dass es nume ne Frag vor Zyt sig bis si de Manne wieder würdi dChöpf verdräihe.

                Wo mir dBeatrice geschter het eröffnet, si sig mir frömd gange, hani minen Ohre fasch nid trout. „Mit wäm?“ hani gfragt u se übere Zmorgetisch übere agstarrt. „Spiut das e Roue?“ Si het mir chum chönne id Ouge luege u ihri Züpfeschnitte het si o nümme aglängt. „Sicher spiut das e Roue. Du chasch nid eifach hie hocke u mir säge du heigsch en angere, mir aber verschwige wärs isch.“ „Weisch no womer denn im Migros mau so Krach hei gha?“ het si gfragt u mi vo unger uche agluegt. „So öppis pinlechs isch schwierig zvergässe,“ hani gseit u ne grosse Schluck Kafi gno. So hani wenigschtens gwüsst wo dä bitter Gschmack i mim Mu isch härcho. „I haders denn scho wöue säge, aber i ha nid gwüsst wie.“ „Aha, so lang geit das auso scho?“ „Ja,“ het si gseit, „es si scho fasch 10 Jahr.“ „U werum seisch mer das ersch itz? Isches öpper woni kenne?“ „Ja.“ Aha. So isch das auso gsy. Sit 10 Jahr het mini Frou es Verhäutnis gha miteme angere u i ha nie öppis gahnet. I ha churz überleit. Was isch vor 10 Jahr gsy, dass si denn en Affäre agfange het? U da ischs mer plötzlech i Sinn cho. Vor öppe 10 Jahr, plus minus, ha ou ig öppis mitere angere gha, äbe mit däm Meitschi mitem Funkle i de Ouge. Isches de müglech gsy, dass dBeatrice glich öppis mitbecho het? Het si vilech e Verdacht gha? Oder, u da hani churz gstocket, het ihre der Fridu vilech öppis verzeut? Das hätt dä doch nid gmacht. Es sei denn … I ha dBeatrice agluegt u se de ganz diräkt gfragt. „Isches der Fridu?“ Si het churz dLuft aghaute u de gnickt.

Fortsetzig fougt

Teil I

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s