E Schwaube macht no ke Summer, Teil I: DJulä, der Päscu u der Ändu

Der Ändu

Der Päscu u i si Nachbersgiele gsy. Zwe Schlitzohre us der Schosshaude wo öppe einisch em Pfarrer e aute Schwizerchracher vorem Fänschter hei abglah, am Egusee grossi Chempe hei iz Wasser gschosse dases dLüt agsprützt het u de Meitschi hei probiert unger dRöck zluege. Im Summer ischer aube mit mir u mine Eutere mit id Ferie cho.  Mir hei ufeme chlyne Campingplatz am Thunersee e feschte Steuplatz fürne Wohnwage gha u dert simer aube der ganz Tag uf Achse gsy, im Wäudli ga Niehle rouche oder de angere Lüt ga streiche spile. Einisch heimer ame Zürcher probiert zOutonummero abzmontiere, hei aber ghörig uf zDach übercho wo dä früecher aus gwohnt isch vom Dusche zrüggcho. Im Badmantu u de Adilette ischer vornis gstange u het üs au Schang gseit. Es angers mau heimer nis id Froueduschi gschliche u hei are junge Holländerin dChleider u zTüechli gstibitzt. Es isch e hübschi gsy u mir si sicher nid di einzige gsy wo fröid hei gha se nackt gseh zu ihrem Zäut marschiere. Gschämt het sech die gar nüt. I gloube, si hets sogar e chli luschtig gfunge. Drei Täg speter wosi de abgreist isch het si em Päscu ömu es Müntschi gäh. Si isch nünzähni gsy, är grad mau drizähni.

               Am Päscu sini Eutere hei früecher gäng gseit i heig e schlächte Ifluss uf ihn, derby isch är drü Jahr euter aus ig u het meh mi zum Chabismache agstiftet aus umgekehrt. Aber am Päscu sini Familie isch sehr religiös gsy u die heis gar nid gärn gseh, dass är mit some Schnuderi wi mir dusse dür dBüsch gschlichen isch. Id Ferie heter mit üs nume dörfe cho, wüu mini Eutere ja so „aständegi Lüt“ sige. Am Sunnti Morge het der Päscu aube mit i Gottesdienscht müesse, het dört brav müesse stiusitze u sech öppis über dBibu la verzeue u da dervo dass aues wo eim im Läbe Spass macht Sünd sig. I gloube es isch nid vo ungefähr cho, dass der Päscu scho früeh sini Unschuud verlore het u sech nume ungärn uf eis Meitschi het wöue feschtlege. Nach der Konf ischer de o grad difig us der Chile usträtte u het sech, sehr zum Erger vo sine Eutere, am Buddhismus zuegwändet. Das isch de aber o nüt worde, wüu der Päscu sech o i Religionsfrage nid het chönne feschtlege. Inzwüsche heter so zimlech aues einisch e chli usprobiert u isch eine vo dene Mönsche worde wo a nüt gloubt ussert a dFreiheit u dass zLäbe zwärtvou isch zums verschwände. Är verbringt viu Zyt dusse ir Natur u umgit sech gärn mit Lüt wo ihm glychgsinnt si. Im Rahme vom erloubte, macht der Päscu eigentlech immer waser wott u laht sech nume ungärn öppis la vorschribe. No hüt isch är mi bescht Fründ, o we mir üs zwüschezytlech e chli usenang gläbt hei. U da chunnt itze dJulä iz Spiu.

           DJulä heimer vor öppe zäh Jahr kenneglehrt u der Päscu het sech sofort ise verliebt. I weiss das, wüuer zwöi mau het müesse luege womer se zerscht mau gseh hei. Es isch ame Mittauterfestival zInterlake gsy, dert wo paar Wuche speter de zGreenfield stattgfunge het. Der Päscu u i hei scho lenger usere Schnapsidee use es chlyses Business zäme ufzoge gha wo genau uf serigi Aläss isch usgrichtet gsy. Es isch wortwörtlech e Schnapsidee gsy, mir si nämlech beidi ghörig bsoffe gsy womer druf cho sy. „Ändu,“ het der Päscu denn zuemer gseit, „weimer nid mau zäme ne Burg boue?“ „Was fürne Burg?“ „So eini us Houz weisch, sone grossi, e Ritterburg.“ „Chöimer scho. Auso ig cha das scho, aber was machsch de du derbi?“ „I mache der Burggrabe u zEfeu u so.“ Werum der Päscu denn im Suff het wöue ne Burg boue wüssemer bis hüt no nid, aber so heimers de gmacht. Ig, der Schriner, ha dBurg bout u der Päscu, der Landschaftsgärtner, het äbe dLandschaft drumume gartnet, e Burgrabe agleit, Efeu ufezoge, sogar e chlyne Irrgarte heter ufgsteut. Das Ganze heimer bi mine Eutere hingerem Hus gmacht wosi zum dryssigschte Hochzytstag si uf Wäutreis gsy. Zmeischte isch nume Fassade gsy, aber für dass dChing ine u use hei chönne, druf umechlättere u sech vorsteue, dases äbe ne richtige Burg sig gsy hets aui Mau glängt. Zur Eröffnig heimer aui Ching usem Quartier yglade, hei Bradwürscht u Bier für dEutere abbotte u ne Märlitante für di Chlyne engagiert. DChing hei riesig Fröid gha, u so het eis zum angere gfüehrt. Mini Eutere si zwar nid schlächt überrascht gsy wosi plötzlech e Ritterburg im Garte hei gha, aber ganz heimlech het die Aktion o i ihne wieder e chli zChing gweckt. Sider denn hei mer üsi Ritterburge u Märlischlösser äbe o a grösere Events wie däm Mittuauterfestival boue, mau so, mau so, ganz nach Wunsch. Viu Gäud gmacht hei mer dermit nid, aber es isch schön gsy, de Lüt chönne ne Fröid zmache. Mir säuber hätte so öppis früecher o ganz toll gfunge. Für es paar Wuche jedes Jahr, simer so vo Ort zu Ort gange, hei nöii Lüt troffe u üs i frömdi Wäute u vergangeni Zyte la entfüehre.

                   A däm Festival zInterlake simer so äbe o presänt gsy, hei üsi Burg ufbout u der Irrgarte ufgsteut. Vom Morge früeh bis am Abe simer beschäftiget gsy. Es isch e heisse Tag gsy, das weisi no genau. Mir isch der Schweiss nume so abeglüffe woni di Schwäre Bäuke hin u här gschleppt ha. Der Päscu mit sine Hecke u Büschli het o veiechli zchrampfe gha. Am Abe simer erschöpft, aber zfride, vor üsem Zäut näb der Burg zämegsackt u hei es Bierli gno. Paar Meter witer äne het ir Zwüschezyt öpper es grosses Zäut miteme Maiboum vor dranne ufgsteut gha. Tische u Bänk u zwo grossi Carrette si o scho parat gstange. De isch e jungi Frou usem Zäut usecho, isch uf eine vo de Tische gstange u het es Banner mit der Ufschrift „Chränzli winde“ afa ufhänke. Der Päscu het, wie scho erwähnt, zwöi mau müesse luege. Das Meitschi het ihm gfaue u zwar so richtig gfaue, i hanims agseh. Si isch würklech e schöni gsy, das hani o gfunge, aber söfu jung si der Päscu u i säuber scho lenger nümme gsy. I hase knapp über zwänzgi gschetzt. Si het churzi Hose annegha u nes schwarzes T-Shirt wore ging über ei Schuutere abegrütscht isch. DHaar het si zämebunge gha, so dass der ober Teil vore Bluemetätowierig uf ihrem Rügge sichtbar isch gsy. Der Päscu het se lang ohni öppis zsäge agluegt. Si Usdruck isch ärnscht gsy u i gloube öppis i ihm het sech denn veränderet. Är het zwar nüt gseit, aber i gloube vo däm Momänt ah het är niemer angers meh wöue. Ohnis zwöue u ohni sich desse bewusst zsi, het är sech uf das Meitschi feschtgleit no bevor si es Wort hei gwächslet gha.

           Wosi zBanner het befeschtiget gha isch si vom Tisch abegstige, het paar Schritt zrügg gmacht, mitem Rügge zu üs, u ihres Zäut betrachtet. Wosi so dört gstange isch u der Päscu se immerno agluegt het, het si sech plötzlech zu üs umdräit. Der Päscu isch ufgstange u zu ihre überegange. Waser zuere gseit het weisi nid, aber si het glächlet u ihn miteme Funkle i de Ouge agluegt. De het si ihm dHang häregsreckt, är het se gschüttlet u isch wieder zu mir überecho, het sis Bier gno u isch im Zäut verschwunde. ZMeitschi isch inzwüsche uf eim vo ihrne Bänk abghocket gsy u het em Päscu nachegluegt. I bi zu ihre überegange u hami vorgsteut. „I bi der Ändu,“ hani gseit, „eine vo de Ritterbürgler da äne.“ „Julä, fröit mi. I bi die wo ab morn hie mit de Ching Bluemechränzli windet. I bi Florischtin.“ „No sone Pflänzlerin. Der Päscu isch Landschaftsgärtner“, hani gseit u mitem Arm uf üses Zäut dütet. „Ah, de isch är auso füre Irrgarte verantwortlech. Gueti Sach. U du bisch der Zimmerma?“ „Schriner.“ So heimer no es Wyli es Schwätzli gha bis o i mis Bier ha ustrunke gha.

                Am nächschte Tag hani beobachtet wie der Päscu u dJulä ging wieder mitenang gflirtet hei. Si hei nang längi Blicke zuegworfe, mau ärnscht drigluegt, mau glächlet, dNöchi zunenang gsuecht u enang nachegluegt. Es isch richtig müehsam gsy. Der Päscu isch nid rächt bir Sach gsy u i hane paar Mau müesse ermahne, dass mir dert am schaffe si gsy. „Itz tue nid so,“ heter gseit, „schüsch bisch aube o nid so verchlemmt.“ Mit Verchlemmtheit het das nüt ztüe gha, aber i ha nid wöue diskutiere. I ha am Päscu sini Faszination scho chönne nachevouzieh, o weni gfunge ha, daser sech o chli hätt chönne zämenäh. Mir het dJulä ja o gfaue u womer am Abe nachdäm zTagesgschäft isch erlediget gsy no nes Lagerfür gmacht hei, paar Kollege gmusiget hei u si het afa tanze, ischs mer o schwär gfaue se nid azstarre. Si het denn vili Blicke uf sech zoge, aber i ha scho gmerkt, dass der einzig Blick wose würklech interessiert het am Päscu sine isch gsy. U dä het a ihre kläbt wie zEfeu a üsere Burgmur. Är het ke Hehl drus gmacht, dass är se het wöue u das het ihre gfaue. Es het de o niemer überrascht wo si zäme i üsem Zäut verschwunde si u lang nüm si usecho. Das isch de no e Tag zwe so gange u i has ufgäh, der Päscu wöue zur Besinnig zbringe. Mit der Julä hanis vo Afang ah guet chönne, o wesi für mi Gschmack fasch e chli zoffehärzig isch gsy.

            Am dritte Abe si si nümme usem Zäut usecho. I ha lang, würklech lang, dusse gwartet, bi de aber irgendeinisch glich o ine ga lige. Es isch öppe zwöi, haubi drü am Morge gsy woni wieder verwachet bi. Zersch hani nume nes lysligs Raschle ghört. Speter hani öpper töif ghöre schnuufe u de nes churzes Stöhne. I hami umdräit u dür zHaubdunku dJulä u der Päscu gseh mitenang umemache. Si isch uf ihm obe gläge u het ne küsst, är het sini Häng uf ihrem Füdli gha u se ganz fescht a sech drückt. I weiss nid werum, aber i ha eifach nid chönne wägluege. Es isch schön gsy ihne zuezluege. Si si zärtlech mitenang umgange. Si het ihri Finger i sine Haar vergrabe gha, het sech aber de langsam vo ihm glöst u sech zu sim Hosebung la abegleite. Si het ihm dHose ufknöpft, het ne abzoge u de der Chopf uf sim Oberschänku abgleit so dass ihres Gsicht zu mir gluegt het. Ganz entspannt isch si dört gläge, dHaar über sim Buch verteilt, u het ne mit eire Hang gstrychlet. Der Päscu het töif Luft ghout u dArme über der Stirn verschränkt. Zersch het si nüt angers gmacht, het ne när aber afa küsse, het ne mit der Zunge berüehrt u schliesslech mitem Mu afa verwöhne. I ha zuegluegt u o gar nümme wöue wägluege. Der Päscu het immer töifer gschnufet u de dHäng a ihres Gsicht gleit. Irgendeinisch hani gmerkt, dass dBewegig nüm vo ihre usgange isch sondern vo ihm. Är het ganz sanft gstosse, sech langsam ine u use bewegt. DJulä het ne rächt lang so la mache, het sech ganz uf si Rhythmus iglah u ihm dFüehrig überlah. Wie der Päscu das usghaute het weisi nid. Ig a sire Steu hätt mi nid so chönne beherrsche. Mir isches vom Zueluege scho fasch zviu worde u i bi froh gsy woner sech schliesslech vo ihre glöst het. Aber das isch ersch der Afang gsy. Si hei sech ufgrichtet, är het se küsst u se langsam uf si Schoss la absinke. Är het zimlech lut gstöhnt woner ändlech ise idrunge isch. Ä Momänt hani witer zuegluegt u zueglost wi sis mitenang gmacht hei, bi de aber ufghocket u zwar so, dass si mi hei müesse ghöre. DJulä het zu mir überegluegt u am Päscu öppis iz Ohr küschelet. Är het nüt dergliche ta, se eifach witer gliebt, aber si het der Arm zu mir usgstreckt. Was söui säge? I ha dere Versuechig nid chönne widerstah. I bi zuene überegange u ha dJulä ohni zzögere küsst während der Päscu wieder isch abgläge. Offesichtlech isch är iverstange gsy u het mir Platz gmacht. Es isch e sehr intensivi Erfahrig gsy. I ha aues ganz bewusst wahrgno u umso meh gnosse wüui gwüsst ha, dass sech so öppis nid no einisch würd ergäh. Es isch ufregend gsy, dass dJulä sech abwächsligswis vo üs het la liebe us offesichtlech gnosse het, vo zwene Manne glichzytig berüehrt zwärde. Si isch zwöimau cho, zersch mitem Päscu, när no einisch mit mir. I bi hinger ihre knöilet während är unger ihre isch gläge u ihre id Ouge gluegt het. Är het se a de Schuutere gha u zuegluegt wie sech ihre Körper meh u meh agspannt het. I has ou gspürt u wosi sowit isch gsy, hets mi schier verjagt.

                Am nöchschte Morge isch der Päscu früeh ufgstange, isch lang dusse vorem Zäut ghocket u het groukt. I weiss nid was ihm denn düre Chopf gange isch u o dJulä het nid viu gseit. Mir si zäme im Zäutigang ghocket u hei der Päscu beobachtet. „Wie aut bisch du?“ hani se gfragt. „Drüezwänzgi.“ „Är isch achtädrissgi.“ I weiss nid werum, aber i ha gfunge si müess das wüsse. Es isch e zimleche Ungerschid gsy. Füfzäh Jahr si nid nüt. Wo der Päscu u i der Holländerin ufem Campingplatz hei dChleider gstohle hets dJulä no gar nid gäh. Söfu jung isch si gsy. Si het mi churz aglächlet u de wieder zu ihm füre gluegt. „Los, i weiss nid wieni das söu säge, aber är het sehr gärn Froue,“ hani gseit. DJulä isch zwar aues angere aus es Unschuudslämmli gsy, das hani ja am eigete Lyb dörfe erfahre, aber i ha glich zGfüuh gha, der Päscu sig ihre um Lengine vorus u würd ihre nume weh tue wesi nid ufpassi. Ihrem Blick hani agseh, dass si denn scho viu für ihn empfunde het. Är het zu däm Zytpunkt scho paar ärnschti Beziehige gha, isch aber immer wieder frömd gange. Är hätt däm säuber nid so gseit, aber schön rede hetmes o nid chönne. I bi nie iverstange gsy mit däm u mir hei öppe die Krach gha we eini vo sine Fründinne sich bi mir isch cho ushüle. Für ihn hei Sex u Liebi nid unbedingt zämeghört u di meischte Froue hei mit däm nid chönne umgah. DJulä het gnickt. Si het mi verstange. Wo der Päscu zrüggcho isch, bini ufgstange u hase elei gla. Was si denn mitenang besproche hei weisi nid, aber si si lang binenang ghocket u hei ärnschti Gsichter gmacht. Am Schluss heisi sech es Müntschi gäh u dJulä isch zu ihrem Stang übere gange ihres Materiau füre Tag ga zwäg mache.

                  I ha no lang über di Nacht mit der Julä und em Päscu nachedänkt, aber passiert isch so öppis zwüsche üs drüne nie meh. Är het zwar nüt gseit, aber i ha gmerkt, dass ärs beröit het. DTatsach, dass no ne angere Ma isch im Spiu gsy het ne nid gstört, da bini mer sicher gsy, aber es het ne gstört, dass ig dä anger Ma bi gsy. I ha gseh winer mi mängisch usem Ougewinku beobachtet het. I gloub är het versuecht abzwäge, öb ig für ihn chönnt e Gfahr darsteue, öb dJulä meh für mi chönnt empfinge u wie är när zu mir würd stah wes eso wär. Es isch so gsy, dass är zerschte Mau i sim Läbe ufne Frou troffe isch wo ähnlech gsy isch wie är. DJulä het vo Monogamie offesichtlech o nid viu ghaute u i ha mer guet chönne vorsteue, dass o si ire Beziehig nid würd tröi sy. Füre Päscu isch das nöi gsy. Är isch no nie dä gsy wo het müesse teile u es isch ihm gloub schwärer gfaue auser dänkt oder zuegäh hätt. Trotzdäm daser für sich körperlechi Luscht u Gfüuh het chönne trenne, isches für ihn doch schwierig gsy, dass dJulä für sich zgliche Rächt igforderet het.

             Säubscht es Jahr speter isch der Päscu mängisch immer no greizt gsy i mire Gägewart. „Was isch?“ hani ne gfragt womer mit der Julä u paar Fründe einisch zSolothurn ame Geburtstagsfescht si gsy. Es isch scho dunku gsy u der Päscu u i si im Garte eis am Rouke gsy. Sowit i gwüsst ha, heisis guet gha zäme, dJulä u är. Trotzdäm hetne öppis gwurmet u i ha o gloubt zwüsse was. „Was isch?“ hani no einisch gfragt u der Rouch usblase. „Hä? Nüt, nüt … Es isch nume …“ Churz heter mi agluegt, het der Chopf aber grad wieder la sinke. „Bisch iversüchtig?“ hani gfragt. Der Päscu het wieder ufgluegt u mi agstarrt. Gseh hani nid viu, aber i ha gspürt wie sech sini Miene verfinschteret het. Är het mer zersch ke Antwort gäh, het nume ne töife Zug vo sire Zigerette gno u mi gmuschteret. „Du bhautisch di Schwanz gfelligscht i de Hose,“ heter när gseit u het mi dert la stah. Es wär gwüss o subtiler gange. Aber der Päscu isch nie eine gsy, wo gärn über sini Gfüuh gredt het u so hani ihm dä Wink mitem Zunpfau la düregah ohni öppis derzue zsäge.

                 Tatsächlech isches so gsy, dass dJulä gäng öppe mit mir gflirtet het u das o gärn emau we der Päscu isch derbi gsy. Är hets nid gärn gseh. Einisch bini bir Julä im Lade verbigange woni ir Länggass e Tisch u Stüuh ha müesse ga abhole zum usbessere. Es isch am früeche Morge gsy, öppe so viertu vor achti, u si het noni offe gha. Mir hei zäme nes Kafi trunke, chli gschwätzt u när het eis zangere gäh. Si het ä Momänt gschwige, isch de zu mir übere cho u mir ufe Schoss ghocket. Si het es churzes Summerröckli anne gha u bevori mi hätt chönne wehre het sis scho ufezoge gha u mini Häng uf ihri nackte Bei gleit. Churz hani zögeret, hase de aber küsst u se ami drückt. Si isch zimlech diräkt druflos gange u bime Haar hätti vergässe, dass si mitem Päscu isch zäme gsy. Bime Haar. I gloub es het se chli i ihrem Stouz verletzt, dasi se schlusemänd doch abgwise ha. I bi säuber überrascht gsy ob mire Widerstandschraft. I hätt se nämlech scho wöue, aber für mi isches trotz dere Nacht im Zäut zInterlake e Frag vom Astang gsy, nid mit der Fründin vo mim beschte Fründ zschlafe. Mir heinis zwar speter no ab und zue küsst wemer si elei gsy, aber Sex heimer nie meh gha. Der Päscu het wahrschinlech vo sich uf mi gschlosse u zGägeteil agno. Är a mire Steu hätts gmacht. Woner mi denn im Garte het la stah, hani mini Zigerette fertig groukt u woni wieder ha ine wöue, isch mer dJulä entgäge cho. „Was isch los?“ het si gfragt, „Der Päscu isch abghoue.“ Das isch nid sini Art gsy. I ha dHäng i de Hoseseck vergrabe u gschwige. „Heter öppis gseit?“ I hares nid wöue säge, aber i hare agseh, dass si sech Sorge gmacht het. „Nüt wichtigs,“ hani gseit. Si het mi ungläubig agluegt. „Är isch iversüchtig,“ hani de gseit. „Uf?“ „Uf mi.“ „Wieso? Es louft doch gar nüt zwüsche üs. U säubscht wenn …“ Si het der Satz nid fertig gredt. I ha aber gwüsst uf was si het use wöue. Säubscht wenn mir öppis zäme gha hätte, är hätt trötzdäm nüt dörfe säge. Är isch ja säuber o nid öppe nes unbeschribnigs Blatt gsy u ihri Beziehig hei si sehr offe gläbt. Für mi wär das so nüt gsy, aber für si hets offebar gstumme. DJulä isch mit de Häng uf de Hüfte vormer gstange u i ha der Päscu trotz sim Agriff plötzlech i Schutz gno. „Los, i gloub äs macht ihm Müeh daser denn isch derbi gsy. I gloub är cha sechs viu zguet vorsteue, wüuer üs scho mau zäme gseh het.“ „I ghöre ihm aber nid. Genauso weni wie är mir ghört.“ „Das müesst dir zäme uschäse,“ hani gseit, „I haute mi drus.“ „Du muesch mi aber itz heifahre. Mir si drum zäme cho u är het zOuto gno.“

                     Zwo Stung speter simer bir Julä ufem Sofa ghocket u hei no es Glas Wy gno. „Der Päscu macht mi fertig,“ het si gseit. „Inwiefärn?“ „I has ihm no nie gseit, aber i bi ou iversüchtig.“ I ha gschwige, hase eifach la verzeue. Das Gspräch hani i ähnlech Versione scho mit angerne Froue gfüehrt gha. „I bi immer iverstange gsy mitere offene Beziehig u am Afang hani o kes Problem dermit gha wener mit ere angere is Bett isch. Mittlerwile störts mi aber. Es isch ecklig, wüui mi frage, öb di angere äch besser si aus ig. Wieso dases ihm mit mir nid längt. Es paar Mau hani o mit angerne gschlafe, aber i ha ging weniger Luscht uf serigi Abentür gha. Es het mi gstört, daser aube nüt derzue gseit het, nid het wöue wüsse wis isch gsy. Es het mi gstört dases ne nid gstört het.“ DJulä het mi erwartigsvou agluegt. „I gloub es het ne nume nid gstört, wüuer gwüsst het, dases für di nüt bedütet het,“ hani gseit, „wüus nid um Gfüuh gangen isch.“ „We das so isch, wieso ischer de itz bi dir plötzlech iversüchtig?“ „Wüu du mi lieber hesch aus de zuegisch. Lue, i weiss, dass dis Härz am Päscu ghört, das hani immer gwüsst. Aber i merke, dass du mängisch mini Nöchi suechsch. I gspüre, dasses dir gfaut wemer üs küsse u i gspüre, dass du meh wettsch vo mir.“ „Du meinsch i bi i di verliebt?“ „Das würdi so nid säge, aber Gfüuh si scho im Spiu u da darf der Päscu o iversüchtig sy.“ DJulä het mir id Ouge gluegt u de di auesentscheidendi Frag gsteut. „Si di Gfüuh de eisitig?“ „Nei, das si si ganz und gar nid. I ha dir denn woni bi dir im Lade gsy bi nume ne Chorb gäh, wüui am Päscu gägenüber es schlächts Gwüsse hätt gha.“ „Du wettsch auso o meh vo mir?“ het si gfragt. I bi versuecht gsy se zküsse, has aber la sy. Grad woni ha wöue antworte, ihre säge, dases ke Roue spili was ig wöu, hets plötzlech glüte. Mir si beidi zämezuckt u dJulä isch schneuer uf de Bei gsy aus nötig gsy wär. Si isch zur Tür gange u paar Minute speter mitem Päscu im Schlepptou wieder zrügg cho. Si hei gstritte gha, das isch unschwär zerkenne gsy. Si het dArme vor der Bruscht verschränkt gha u mit de Träne kämpft. Der Päscu isch ganz und gar nid erfröit gsy mi dert zgseh hocke, isch schwigend ufmi zuecho u het mi lang gmuschteret. U när, ganz unvermittlet, het är mir därewä eini ineghoue, dases mer hurti schwarz vor Ouge isch worde. DJulä het sofort probiert izgrife, aber der Päscu het nüt wöue wüsse u het mi winduweich gschlage. Nach däm erschte unerwartete Schlag hani mi nüm rächt chönne wehre. Woner du ändlech vo mir het abglah isch mis T-Shirt bluetüberströmt gsy u i ha chum meh Luft übercho. Är isch am Bode zämegsackt u dJulä isch ging no wie agwurzlet näbedranne gstange, dHäng vorem Mu u Träne i de Ouge. Fürne Momänt het niemer öppis gseit. „Ändu,“ het si de gseit, „du geisch itz gschider iz Bad u när ga lige. Chasch mis Bett ha. I chume när cho luege wis der geit.“ Inzwüsche het der Päscu afa hüle. DJulä isch zu ihm a Bode ghocket u het ne id Arme gno. I ha gseh wis ne gschüttlet het wo siner Emotione ändlech us ihm use broche si. I ha mi langsam ufgrichtet, versuecht dSchmärze zignoriere, u bi ohni der Umwäg iz Bad ga ablige.

                      Am nöchschte Morge bini mit Migräne ume zuegschwuunige Oug verwachet. Der Päscu isch näbem Bett ufeme Stuuh ghocket, dEuböge uf de Chnöi ufgstützt u dHäng vorem Mu gfautet. Wenis nid besser gwüsst hätt, hätti gmeint är bätti. „Blib lige,“ heter gseit woni mi ha wöue ufrichte. „DJulä chunnt grad u bringt der öppis ztrinke.“ „Es isch im Fau nüt passiert,“ hani gseit, „gar nüt.“ „I weiss. Es isch e Fähler gsy.“ „Was? Dass du mi verschlage hesch?“ „Aues. Vo Afang ah.“ I bi mer nid sicher gsy waser dermit gmeint het. „Der Päscu geit itz,“ het dJulä vor Tür gseit. Si het es Glas Wasser ir einte Hang gha, es früsches Frottiertuech ir angere u isch näbe mir ufem Bett abghocket. Der Päscu isch ufgstange u i hane lang nümme gseh.

                      Öppe zwöi Jahr speter hani der Julä ame Samschti ufem Märit ghuufe. Si het e chlyne Stang gha ufem Bäreplatz wosi Bluemechränz u Strüss verchouft het. Si het viu Chundschaft gha u het nid gmerkt, dass der Päscu isch verbiglüffe. Är isch churz blibe stah u het wahrschinlech gwärweiset öber söu cho hallo säge. Mir isches säuber o nid würklech drum gsy mit ihm zrede, aber eifach nüt dergliche tue hani o nid chönne. I ha dJulä agstüpft u zu ihm übere gnickt. Si isch zersch wie agwurzlet blibe stah, het de aber zUsegäud fertig zeut wosi i de Finger het gha u het der Päscu zuesech gwunke. Si het paar Schritt ufne zuegmacht u de uf nes läärs Bänkli näbem Brunne zeigt. I ha derwile witer gschaffet, se aber usem Ougewinku beobachtet. Si si näbenang abghocket u hei nang zersch schwigend agluegt. När het är se öppis gfragt u si het gantwortet. Är het zu mir übere gluegt u gnickt. Es isch nid lang gange bis si wieder si zrügg cho. Der Päscu het mir dHang gäh u isch de wieder i de Lüt verschwunde. „Was heschim gseit?“ hani dJulä gfragt. „DWahrheit.“ „U was isch dWahrheit?“ Si het abgwunke u het sech wieder a dArbeit gmacht.

                     Speter am gliche Tag het si mir eröffnet, dass si schwanger sig. Mir si zäme uf der chlyne Schanze ir Sunne gläge u i ha minen Ohre fasch nid trout. Si het mir id Ouge gluegt u ufne Antwort gwartet. „Isches vo mir?“ hani gfragt. Si het flüchtig glächlet u i ha grächnet. „De bisch itz öppe vier Mönet?“ „Drü.“ Es isch scho nes Wyli här gsy, dass mer zletschte Mau mitenang gschlafe hei, so gnau hanis nüm gwüsst. Es isch nid mängisch vorcho, aber nachdäm der Päscu verschwunden isch gsy, hani kes schlächts Gwüsse meh gha. I ha dJulä sehr gärn gha u hase drum nie meh abgwise wesi zu mir isch cho. U wemer nume nes Bizeli meh fürenang empfunde hätte, de wäre mer wahrschinlech es Paar worde. Aber e Schwaube macht no ke Summer. Es isch eso gsy, dass mir nid richtig inenang verliebt si gsy. Es paar Schmätterlinge si zwar ume gsy, aber glängt het das nid. „Aber mir hei doch gluegt?“ hani gfragt. „Das hani mire Frouenärztin o gseit,“ het dJulä gseit, „aber si meint es sig eso.“ „U wie geiz dir dermit?“ „Eigentlech ganz guet. Überraschend guet würdi säge. Es fröit mi gloub sogar.“ „Wie weimer de das mache? Weimer zämezieh?“ I ha mir das grundsätzlech guet chönne vorsteue, so überraschend wie das aues isch cho. „Müesse mer das?“ Si het mi fragend agluegt u i ha der Chopf gschüttlet. „Mir müesse gar nüt wemer nid wei.“ Si het churz i Himu ufegluegt u de töif Luft ghout. „I ha di würklech sehr gärn u es wär sicher schön, mit dir zäme zläbe, aber was wäre mer de?“ „I weiss o nid. Müesse mer unbedingt e Bezeichnig derfür ha? Mir chöi doch eifach Fründe sy wo zäme läbe, es Ching zäme ufzieh u vilech o ab und zue mau zäme is Bett göh. U wenn nid, isch ou guet.“ „Tönt eigentlech nachere ganz normale Beziehig.“ Da het si Rächt gha. „Los, was ou immer du für richtig hautisch, i bi derby,“ hani gseit u ihre nes Müntschi uf dStirne gäh. Si het glächlet u mini Hang gno.

                     E Zyt lang simer eifach nume so dört gläge. I ha dOuge zue gmacht, dWermi vor Sunne gspürt u mir vorgsteut mit der Julä zämezläbe. U di Vorsteuig het mer überraschend guet zuegseit. I bi inzwische o scho achtädrissgi gsy, so aut wie der Päscu womer dJulä hei kenneglehrt, u ha nid zGfüuh gha i müess no ‚angeri Erfahrige mache‘ wie me so schön seit. Zeinzige wo mi gstört het isch gsy, dass sis mir nid us erschts verzeut het. „Was het der Päscu derzue gseit?“ hani plötzlech gfragt. DJulä het sech zu mir umdräit u sech uf dEuböge gstützt. „Nid viu,“ het si gseit, „är hets zur Kenntnis gno.“ „Är isch scho immer iversüchtig gsy uf mi.“ „Bevor är abghoue isch, denn woner di …“ „Woner mer dFrässe poliert het?“ „Red bitte nid so.“ „Es isch aber wahr.“ „Item. Du hesch denn di ganzi Nacht gschlafe. Der Päscu u i hei lang mitenang gredt. Är hetmer denn paar Sache verzeut woni nid gwüsst ha.“ „Vo sim Vatter?“ hani gfragt. „Unger angerem. Du weisch das?“ „Ja sicher.“ I weiss no wo der Päscu einisch es paar Täg nid isch ir Schu gsy. I ha agno är sig chrank u bi ne de einisch ga bsueche. Vome Klassekolleg vo ihm hani siner Ufgabe becho u nim die bracht. Sini Muetter het mi zersch nid wöue inelah, het de aber glich dTür ugmacht. Är het drigseh wie wener vome Laschtwage wär überfahre worde. Es huere Veieli heter gha, e ufplatzti Lippe, Bluetergüss a den Arme. Är het mer zersch nid wöue säge was passiert isch, aber i ha nid lugg gla. Si Vatter het ne bim Sex miteme chli eutere Meitli verwütscht gha. ZMeitli heter zum Tüfu gjagt, wortwörtlech, u der Päscu het Prügu kassiert. „I weiss nüm gnau wie aut der Päscu denn isch gsy, aber no rächt jung,“ hani gseit. „Vierzähni,“ het DJulä gseit. „Das ma sy. Woni si Père znächscht Mau ha gseh hani ne grosse Boge um ihn gmacht. Är isch eigentlech ke Schlegertyp gsy u soviu i weiss heter der Päscu vorhär u nächhär nie meh aglängt. Aber dass si Sohn e sone ‚unzüchtige Hagu‘ isch gsy, heter nume schwär verchraftet.“ DJulä het e Momänt gschwige. „Woner mi sim Vatter het vorgsteut,“ het si de gseit, „hani natürlech ke Ahnig gha u i bi rächt überrascht gsy woner mi vo obe bis unger gmuschteret het u der Päscu gfragt het waser mit some junge Güetzi wöu. Speter heiger ihm gseit är verstöngi nid wieso der Päscu nid meh chöng si wie du. Du sigsch doch sone aständige u würdsch di nie mit some junge Meitschi ilah wie mir.“ „Ächt? Früecher hets aube ganz angers tönt, aber das erklärt einiges. Was heter dir no verzeut?“ „Dass du ihm einisch dFründin usgspannt heigsch,“ het si gseit u mi fordernd agluegt. „Das isch so nid wahr. I hase ihm nid usgspannt. Är isch ihre frömd gange u si het sech bi mir usghület. I bi denn öppe zwänzgi gsy, si chli euter. Glüffe isch nüt zwüsche üs, aber si het bhouptet si heig sech i mi verliebt u das het der Päscu gar nid möge ha. Dases gstumme het gloubi nid, aber das änderet ja nüt. Si het ihn wöue iversüchtig mache u das isch ihre glunge.“ Äs isch scho luschtig gsy, der Päscu hätt kes Problem dermit gha we sini Fründin denn eifach mit mir is Bett ghüpft wär, mau ganz abgseh dervo das ig das nid mitgmacht hätt, aber sobauds um Emotione gangen isch, hets bi ihm ufghört mit der Offeheit. Womer dJulä kenneglehrt hei uner gmerkt het, dass mirs guet hei chönne zäme, u ne gwüssi Aziehig isch ja da gsy, heter gloub nüm gwüsst, was mit sine Gfüuh afah. „Es tuet mer leid,“ het DJulä gseit. „Was tuet der leid?“ hani gfragt, aber si het nüt meh gseit.

                    Es isch e verzwickti Situation gsy. DJulä u i si zämezoge u üsi Familie u Fründe hei aui gmeint mir sige nes Paar. Nume si u i hei gwüsst, dass es nid so isch gsy. Mir hei zwar ab und zue no öppis gha zäme, si aber primär Fründe gsy. Uf ne Art simer aber doch e ganz e normali Familie gsy u bis üsi Tochter isch vieri gsy het das so o rächt guet funktioniert. Schwierig isches eigentlech nume gsy we dLüt üs gfragt hei wenn mer de ändlech tüege hürate oder we der Päscu zBsuech isch gsy. Zersch heimer ne nume säute gseh, aber speter heimer meh u meh Kontakt mit ihm gha. Aso gnau gno het dJulä geng meh Kontakt mit ihm gha. Si hei viu telefoniert weni nid bi deheime gsy, das hani a dä Telefonrächnige gseh. Si het ne o ging hüfiger zum Ässe iglade u es isch nid lang gange bis si de einisch no vorem Dessert mit ihm i üsem Schlafzimmer verschwunden isch. I ha der Chlyne ufem Sofa es Gschichtli vorgläse womer dJulä plötzlech hei ghört stöhne. „Was het zMami?“ het si gfragt u mi mit grosse Ouge agluegt. „Nüt,“ hani gseit, „si het nume Fröid, dass der Pascal da isch.“ „Das tönt aber nid so.“ „Das muesch du noni verstah,“ hani gseit u se iz Bett bracht. I ha gmerkt, dass dJulä viu lieber mitem Päscu zäme gläbt hätt aus mit mir. Das ahnsich isches aber nid gsy womi a däm Abe hässig gmacht het. O dTatsach, dass sis aube i üsem gmeinsame Bett tribe hei isch für mi relativ unproblematisch gsy. Inzwüsche ha o ig Sex und Liebi chönne trennä u richtig gliebt hani dJulä nach wie vor nid. I ha aber nid wöue, dass di Chlyni dürenang chunnt u wie hätti ihre söue erkläre, dass ihres Mami der Pascal lieber het gha aus der Papi? Wosi du ändlech usem Schlafzimmer si usecho, sichtbar erliechteret, hani em Päscu es Bier uftah u vor ihm ufe Tisch knaut. „Was isch?“ het dJulä gfragt. „Znächscht Mau chöiter warte bis zSiuvi im Bett isch.“ Der Päscu het dJulä vorwurfsvou agluegt. „Das hani o gseit.“ „Gopf, was weit dir eigentlech vo mir?“ het dJulä gfragt, „Öich chames scho nid rächt mache.“ „Was söu itz das wieder heisse?“ hani gfragt, „du bisches ja wo wott zwöigleisig fahre. Du ladsch der Päscu ja ging wieder i u tribsch es när mit ihm i üsem Schlafzimmer. Chasch ja o mau zu ihm gah.“ „Das machi dänk, was meinsch de du?“ DJulä het mi chaut übere Tisch übere agstarrt, der Päscu het gschwige. „Du hesch genau gwüsst uf was du di ilasch,“ het dJulä gseit. „So? Hani das? Weni mi rächt erinnere isch das hie nie zur Debatte gstange.“ „Är het Rächt,“ het sech der Päscu wieder igschaute u i bi überrascht gsy, dass är uf mire Site isch gsy, „Wo du mitem Ändu zämezoge bisch hei mir ja gar ke Kontakt meh gha.“ „Du hesch mir ja ke Wau gla,“ het dJulä zum Päscu gseit, „Du bisch eifach abghoue.“ „Itz fang nid scho wieder mit däm ah,“ het der Päscu gseit u i bi nüm nachecho. „Mit was söu si nid afah?“ hani gfragt. Der Päscu het mi lang agluegt u de plötzlech öppis gseit woni nid dermit grächnet ha. „DJulä u i hei üs no einisch gseh.“ „Wenn?“ „Es Zytli bevor i bi öich ufem Märit bi verbi cho.“ I ha dJulä fragend agluegt u si het sech uf dLippe bisse. „Mir si enang mau id Arme glüffe ame Konzärt,“ het si gseit u zum Päscu gluegt, „u i ha … du hesch mi nümme wöue.“ Der Päscu het der Chopf gschüttlet. Offebar isch är mit dere Version nid iverstange gsy. „Das stimmt so nid ganz,“ heter gseit, „aber das änderet itz o nüt meh.“ I bi gäng noni nachecho, ha aber o gar nümme wöue nachefrage. Mir isch das Ganze langsam zum Haus usghanget. „I ga itz gschider,“ het der Päscu gseit u isch ufgstange, aber i ha ne am Euboge packt u wieder ufe Stuh drückt. „Luget,“ hani nachere länge Pouse gseit, „we zSiuvi nid wär, de wär di Sach ja ganz eifach. I bi nid blöd u i bi o gar nid iversüchtig. I weiss nume nid wieni mire Tochter söu erkläre, dass si plötzlech zwe Papine het.“ „Das het si doch gar nid,“ het der Päscu gseit. „Itz noni, aber we du hie iziehsch u ig uszieh, denn scho.“ „Wär seit so öppis?“ het dJulä gfragt. „Ig. Ig säge das. I ha ke Luscht meh hie zsitze u öich bim Sex zuezlose u i ha o ke Luscht abetelang hie elei mitem Siuvi zsitze we du bim Päscu bisch. I bruche weder zfüfte Rad am Charre zsi no Babysitter für mini eigeti Tochter zspile. Drum schlani vor, dass der Päscu i ig Platz tusche.“ Der Päscu u dJulä hei enang lang agluegt u schliesslech gnickt. So heimers de o gmacht. Ig bi uszoge u der Päscu isch izoge. Es wird sicher mau der Momänt cho wo zSiuvi, wesi aut gnue isch, wird wöue wüsse, was passiert isch. Wieso ig denn gange bi u der Pascal plötzlech isch blibe. U de wirdi ihre di ganzi Gschicht verzeue, wirde säge, dass är äbe zwöi mau het müesse luege woner zMami zerschte Mau gseh het.

DJulä

I ha der Päscu scho lang gseh gha. Der Ändu u är si der ganz Namittag beschäftiget gsy u hei nid gmerkt, dasi se heimlech beobachtet ha. Si hei zügig gschaffet, si nes igspiuts Team gsy. Offesichtlech si sis gwahnet gsy körperlechi Arbeit zverrichte u am Päscu het me agseh, dass är viu dusse gsy isch. DSunnä het ihm schinbar nüt usgmacht, obschon si uf üs abezündet het wi no nie i däm Jahr. Der Ändu het chli meh Müeh gha, het aber guet chönne mithaute. Si si beidi attraktivi Manne gsy, aber es isch der Päscu gsy wo mi azoge het. Är het mir gfaue u i ha gäng wieder zu ihm müesse übereluege. Woner du plötzlech vormer gstange isch, bini fasch e chli verläge worde. Är het gar nüt gseit, isch eifach nume da gstange u het mi agluegt. Är isch verschwitzt gsy, dHaar heinim uf beidne Site am Gsicht kläbt, aber es isch ihm glich gsy. I ha ihm id Ouge gluegt u sofort gwüsst was gschlage het. No nie het öpper so weni zu mir gseit u isch glich so diräkt uf mi zuecho. Das het mi sehr beidruckt. Offesichtlech hanis da mit öpperem ztüe gha wo sehr genau gwüsst het waser wott u o gwüsst het wieners bechunnt. I ha ihm dHang entgägegstreckt u woner se gno het, het sech öppis i mir inne bewegt. Es het mer e chline Stich is Härz gäh u i ha gwüsst, dasi däm Ma nid würd chönne widerstah. I ha ihm nachegluegt bis är i sim Zäut verschwunde isch gsy.

                Der Ändu isch einiges gsprächiger gsy aus der Päscu, het aber mit viu meh Wort viu weniger gseit. Das isch nid a ihm persönlech gläge. Ig säuber ha o bereitwiuig Uskunft gäh über mi, ha aber eigentlech o nid viu gseit. Mit small talk isch das äbe sone Sach. Serigi Gspräch versuecheni nach Müglechkeit zvermide, aber mängisch geiz haut nid angers. DTatsach, dass der Päscu schinbar guet ohni sone banale Wortwächsu isch uscho het mir imponiert u i ha di haubi Nacht über die Begägnig nachedänkt.

                Mini Muetter isch immer eini gsy wo viu gredt het. Si isch eleierziehend gsy, isch viu elei gsy u het drum gloub e chli kompensiert we mir mau Bsuech hei gha. Si isch elei gsy, wüu mi Vatter se scho churz nach mire Geburt het verlah. Eigentlech isches ganz klassisch gsy. Är het e jüngeri gfunge u het lieber mit derä wöue um dWäut zieh, sech irgendwo ime Hotelbett vergnüege oder ga Party mache u dergliche tue är sig no einisch zwänzgi statt mire Muetter häufe Wingle wächsle. Si het ne gliebt u i gloube si tuets no hüt. I ha scho ging gspürt, dass si sehr verletzt isch gsy, o weni das us Ching noni hätt chönne i Wort fasse. Woni zerschte Mau verliebt gsy bi, het si mi gwarnet. „Juli,“ het si gseit, „pass uf, wäm du dis Härz verschänksch.“ Si het mi de o lang versuecht zbeschütze vor de Giele, het mi nume ungärn la furtgah, u wos zerschte Mau mit eim isch ärnscht worde hani gmerkt, dass si mit sech kämpft het. Si het aber nüt gseit u mi mini Erfahrige säuber la mache. U es si nid nume gueti Erfahrige gsy. O i bi zwüschine verletzt worde. Einisch o vo öpperem woni würklech ha gärn gha. Scho gly bini mit mim Härz sehr vorsichtig umgange. Mit mim Körper hingäge bini nid knouserig gsy. De Giele het das natürlech gfaue u so isches cho, dasi mit nünzähni scho viu meh Erfahrig gha ha aus di meischte vo mine Fründinne.

          Mit einezwänzgi hani zerschte Mau öppis miteme eutere Ma gha. Är isch vierefüfzgi gsy u het bi mir roti Rose für sini Frou kouft. Zum Hochzytstag. I ha gfunge das sig e chli längwilig, aber är het zGfüuh gha dFroue wöue doch roti Rose. Scho gly ischer wieder bi mir im Lade gstange u het gseit är müess no einisch es Strüssli ha zum Geburtstag. DWuche druf isch es dAbschlussfyr vor sire Tochter gsy, wo vermuetlech öppe glich aut isch gsy wie ig säuber, u de isch scho churz drufabe Valentinstag gsy. I ha i dere Zyt rächt guete Umsatz gmacht mit ihm, aber i ha scho gmerkt, dass är nid de Blueme wäge ging wieder zuemer isch cho. Irgendwie hanis härzig gfunge. Är isch närvös gsy, het sech mängisch o verhaschplet wener mir es Komplimänt het wöue mache, u mi hets afa wunger näh, öb ig vilech o a ihm chönnt gfaue finge. Rückblickend bini nid stouz druf, ganz und gar nid, aber denn bini mir über dKonsequänze vo mim Tue no nid im Klare gsy. Eines Tages, es isch agäblech wieder e Geburtstag agstange, hane mit iz Büro hingere gno u ne gfragt, was är eigentlech vomer wöu. „I weiss o nid rächt,“ heter gseit u beschämt a Bode abe gluegt. Woni no einisch gfragt ha, heter mer de id Ouge gluegt u gseit är wöu mi gärn küsse. Zwüsche de Bei. I ha nid lang überleit, bi ufe Schribtisch ghocket u hane vor mir la abchnöile. Es isch nume einisch passiert u i hane när nie meh bi mir im Lade gseh. Paar Wuche speter hani ne aber bim Ichoufe mit sire Frou gseh stritte. Si het wiud gestikuliert u i ha gmeint zwüsse um wases isch gange. Öb si würklech wäge mir gstritte hei wagi hüt zbezwifle, aber müglech isches. Si isch i Träne usbroche u hetne vorem Joghurtregau la stah. Är het ganz verlore usgseh, chli u verletzt. Churz heter i mini Richtig gluegt, het mi aber nid gseh. I ha mi denn sehr gschämt u hätts am liebschte ungscheh gmacht.

                  Mit drüäzwänzgi, woni der Päscu u der Ändu kenneglehrt ha, ha de o ig genau gwüsst wasi ha wöue. E feschti Beziehig isches nid gsy. Viu meh bini uf der Suechi nacheme Abentür gsy, nach öppis unverbindlechem. Öppisem wo niemer derbi würd verletzt wärde u wome när nid viu Wort müesst drüber verlüre. Bim Päscu hani sofort es guets Gfüuh gha. Ihm isches ähnlech gange wie mir, das hani gspürt. Wie gseit hani sofort gwüsst was gschlage het woner so isch vormer gstange. Es isch vo Afang ah klar gsy, dass mir zäme würde im Bett lande, es isch nume e Frag vor Zyt gsy. Lang isches auerdings nid gange. Zeinzige woni nid dermit ha grächnet gha isch gsy, dass i mi scho bim zwöite Mau i ihn verliebt ha. Zerschte Mau womer bi ihm im Zäut verschwunde si isch aues sehr schnäu gange, bim zwöite Mau aber heimer üs Zyt gno. U plötzlech isch aues angers gsy. Plötzlech isches nümme nume um zKörperleche gange, plötzlech si bi mir Gfüuh entstange woni scho lang nüm gspürt ha gha u i ha ihm mis Härz uftah ohni daser viu derfür hätt müesse tue. Glichzytig hani aber o gspürt, dass es o für ihn nüm eifach nume Sex isch gsy. Är het gar nüt müesse säge, i has eifach gwüsst. U es isch schön gsy. Überraschend, unerwartet, aber schön.

                  I dere Nacht wo der Ändu üs beobachtet het, bini am Päscu scho ganz und gar ergäh gsy. U glich hets mi greizt, der Ändu mit iz Boot zhole. Es het mi wunger gno wie sechs würd verändere we är derzue chiem, was fürne Dymanik würd entstah wemer plötzlech zdritt wäre. I ha am Päscu iz Ohr küschelet dasi das wöu probiere u är het schier unmerklech gnickt. Was är gnau dänkt het weisi nid, aber är isch schinbar offe gsy für aues. I ha dä Schritt nie beröit, o wenis nid no einisch miech. Für mi isches es wunderschöns Erläbnis gsy, wüu si beidi sehr zärtlech mit mir umgange si. Kene het sech mir ufdrängt, beidi heisi bereitwiuig am angere Platz gmacht. Obschon i der Päscu bevorzugt ha, isch der Ändu e nid minder ufregende Partner gsy. U glich bini am nöchschte Morge nachdänklech gsy. Woni der Päscu ha gseh vorem Zäut usse am Bode hocke isch mir plötzlech klar worde, dass es für ihn komisch mues gsy si mit sim beschte Fründ e Frou teilt zha. Gfragt hani ne nie diräkt, aber i gloube, dasers im Nachhinein beröit het. Der Ändu het schinbar besser dermit chönne umgah, aber bi ihm bini mer ou sicher gsy, dass är nüt witer für mi empfunde het. Wo der Päscu wieder zu mir isch cho, isch der Ändu ufgstange u gange. Am liebschte hätti der Päscu i Arm gno, aber är het mi zersch nid emau agluegt. „I ha ghört du heigsch gärn Froue,“ hani gseit. Är het churz überleit u de gnickt. „I haute nid viu vo Monogamie.“ „Ig o nid. Offesichtlech.“ Är hetmer es flüchtigs Lächle gschänkt u het de wieder a Bode abe gluegt. „Wenn wirsch du iversüchtig?“ heter gfragt. „We Gfüuh im Spiu si. U du?“ „Schunnt drufa.“ „Uf was?“ „Wärs isch schinbar.“ Da heter mer id Ouge gluegt u i ha gseh, dasses ihm nid liecht gfaue isch, mir das zsäge. „Der Ändu?“ hani nachere churze Pouse gfragt. „Geschter hets mi nid gstört. Hüt scho.“ I has zwar gahnet gha, aber es het mi glich überrascht das so zghöre. „Hets der gfaue mit ihm?“ heter gfragt. „Es isch schwierig zerkläre. Es het mer gfaue, aber es isch irgendwie emotionslos gsy. Mit dir isch es angers. Mit dir isch aues viu intimer.“ „Wüui i di verliebt bi?“ „Nei, wüu ig i di verliebt bi. I wott dir aues gäh vo mir u i wott o aues vo dir.“ Da het der Päscu müesse schmunzle. I ha ihm es Müntschi gäh u bi de mire Arbeit nachegange.

               Nachem Festival heimer üs zersch es paar Wuche nid gseh. Mir hei wöue luege, öb die Aziehig zwüsche üs vilech situationsbedingt isch gsy oder öb die o em Autag standghaute het. Das het si. Womer üs zerschte Mau wieder gseh hei isches so gsy wie vorhär u mir hei dört witergmacht wo mir hei ufghört gha. Mir hei üs hüfig gseh, hei viu Sex gha u stungelang mitenang gredt. U glich isch es nid lang gange bis der Päscu mau are Party mitere angere het afa umemache. I ha gwüsst, dases einisch so würd cho u trotzdäm hani e churze Ussetzer gha woni se zäme ha gseh. I ha gschlückt u mi de wieder mim Gsprächspartner zuegwändet. Paar Wuche speter isch der Päscu mitere is Bett. Är het mers verzeut u di Sach isch gässe gsy. Zwe Mönet speter ischs en angeri gsy. Är het mers wieder verzeut u i has erstunlech locker chönne wägstecke. Bir dritte Frou isches aber nümme so eifach gsy. „We das zur Routine wird,“ hani gseit, „de wottis de aber nümme wüsse.“ „Isch guet,“ heter gseit u nie meh öppis verzeut. Gmacht heters trotzdäm. Ig säuber bi ihm o frömd gange, aber eigentlech hani gar nid gwüsst werum u i ha o nid zBedürfnis gha mit ihm drüber zrede. Einisch hani mitem Ändu abandlet, aber o das hani für mi bhaute. Är isch emau am Morge früeh bi mir im Lade verbicho woner gschäftlech isch ir Länggass ungerwägs gsy. I ha denn e schlächte Tag gha, wüu der Päscu dNacht vorhär vermuetlech wieder mau ime frömde Bett verbracht het. Är het eigentlech no zuemer wöue cho, hetmer när aber abgseit ohni zerkläre werum. Das hani dervo gha dasi gseit ha i wöus nümme wüsse. Am Päscu sis Verhaute het mi meh u meh egoistisch dünkt u es isch mer immer schwerer gfaue da drüberwäg zluege. Wo der Ändu auso bi mir isch verbi cho hani gueti Luscht gha am Päscu heimlech eis uszwüsche. Är hätts o gar nid müesse wüsse. Es hätt glängt we igs gwüsst hätt. Chindisch isch das vor mir gsy. U we der Ändu e chli weniger aständig gsy wär, wener meh gsy wär wie der Päscu, de hätter mi grad dert ufem Stuh oder ufem Tisch chönne näh. Är het mi am Schluss aber doch vo sich wäggstosse. I bis nid gwahnet gsy e Chorb zbecho, no derzue vo öpperem wo scho mau mit mir isch intim gsy. Am Ändu sini Zrügwisig ahnsich het mi aber wit us weniger troffe aus dTatsach, dass der Päscu schinbar jedi het chönne ha u i nid emau e guete Fründ vo mir. Dass der Päscu trotzdäm iversüchtig worde isch, isch e chline Troscht gsy.

                 Är het lang nüt gseit, aber i has gmerkt. Es het ihm gar nid passt, dass der Ändu u i üs so guet verstange hei. Insgeheim hani gloub fasch ghofft, daser mau würd zMu uftue. Wos de aber sowit isch gsy, bini ghörig uf dWäut cho. Wo der Päscu denn bi mir isch cho lüte u ig ihm gseit ha, dass der Ändu da isch, het är sini Vermuetige bestätiget gseh. Är het nämlech scho lenger gmeint, dass der Ändu u i en Affäre heige u zwar eini wo ihm si Platz i mim Härz chönnt stritig mache. Wit dernäbe ischer ja nid gläge, aber im Verglich zu ihm säuber bi ig denn würklech es Unschuudslämmli gsy. Oder besser der Ändu. „Du weisch, i hader denn gseit, dasses mi stört mitem Ändu,“ het der Päscu gseit woner bi mir im Türrahme isch gstange. „Du chasch mir aber keni Vorschrifte mache,“ hani gseit, „I säge dir ja o nid, mit wäm de darfsch u mit wäm nid.“ „Um mi geiz hie aber nid.“ Är isch richtig hässig gsy. Wahrschinlech ischer verbicho zum sech entschuudige u isch drum umso meh enttüsch gsy, dasi nid elei bi gsy. „Ah nid? Um wän de?“ hani gfragt u dArme vor der Bruscht verschränkt. Der Päscu het mi lang agluegt u när die Frag gsteut wo ihm vermuetlech scho sit Monate uf der Seele brönnt het. „Liebsch ne?“ Mi hets verletzt, daser das ärnschthaft i Betracht zoge het. „I ha immer di gliebt,“ hani gseit, aber är het nümme wöue lose. Är het mi vor sech häre id Wohnig iche gschobe u het der Ändu konfrontiert. Dass der Päscu so het chönne usraschte hätti ihm nie zuetrout. Äs isch schlimm gsy, ihn so zgseh. Minetwäge heter uf si bescht Fründ idrosche, dass zBluet nume so gsprützt het. Nächer ischer zämebroche u das isch no bau schlimmer gsy aus sini Wuet. I ha zeinzige gmacht woni i dere Situation ha chönne. I ha der Päscu tröschtet u i ha ihm zueglost. U trotzdäm isches sofort klar gsy, dass öppis zwüsche üs isch id Brüch gange. Är het mir offesichtlech nid vertrout u plötzlech bini o gar nüm sicher gsy, öbi sis Vertroue überhoupt verdient hätt. I has ja tatsächlech wöue misbruche. Är het Rächt gha. I ha gwüsst, dass der Ändu der einzig isch gsy woni nid ha dörfe ha u trotzdäm hättis gmacht. Absichtlech, zum der Päscu verletze. Chindisch isch das vo mir gsy. A däm Abe hani ändlech verstange, dass der Päscu mi tatsächlech nie hingergange het. Är het mir nie öppis verheimlecht, isch immer ehrlech gsy u het nie mit eire gschlafe wo Gfüuh wäre im Spiu gsy. I ha ihm gseit gha, dass mi das iversüchtig miech u är het sech dra ghaute.

                Am nöchschte Tag isch der Päscu verschwunde u i hane fasch zwöi Jahr nümme gseh. Es isch e schlimmi Trennig gsy für mi. Der Schmärz isch gross gsy u i ha der Päscu umso meh vermisst, wüui bi sicher gsy, daser nie meh würd zrügg cho. Der Ändu isch für mi da gsy, het mir zueglost, mi id Arme gno, mi tröschtet wenis ha brucht. U när isch der Päscu plötzlech wieder vormer gstange. Es isch am Muse Konzärt im Wankdorf gsy. I wirdes nie vergässe. Äs isch zlut gsy zum irgendöppis säge, aber das isch o gar nid nötig gsy. Woni der Päscu nach so langer Zyt wieder gseh ha bini zersch wie agwurzlet blibe stah. När hani sini Hang gno, är het mi küsst u no währendem Konzärt simer zäme uf der Toilette glandet. Es isch e churzi, aber sehr intensivi Begägnig gsy. Chum isch dTür hinger üs iz Schloss gfaue hetmer der Päscu ungere Rock glängt, i ha dBei breit gmacht u är het mi ufem Wöschtisch gno. Angers chanis nid säge. Es isch würklech so gsy, dass är ohni grossi Umschweife u ehnder grob isch zur Sach gange. I däm Momänt het mir das nüt usgmacht. Ersch woner isch fertig gsy, isch mir bewusst worde, dass är vorhär nie so mit mir umgange isch. Inzwüsche weisi, dass der Päscu denn mitere angere Frou isch zämegsy u ig plötzlech die bi gsy woner mitere frömdgange isch. So isches mit ihm gsy wener keni Emotione zeigt het, wes ihm nume um Sex isch gange. I ha ihm zuegluegt wie är sich dHäng gwäsche het, sich mit de nasse Finger über zGsicht gfahre isch u sech ä Momänt ufem Wöschtisch ufgstützt het. När heter zu mir übere gluegt u i ha i sine Ouge gseh, daser sech gschämt het. U je lenger är mim Blick trotzdäm standghaute het, desto meh hani verstange wieso. Woni ihn ha wöue id Arme näh, ischs mir plötzlech warm am Bei abeglüffe. I ha nes Tela gno u bi dermit ire WC Kabine verschwunde. Woni wieder bi usecho, isch der Päscu wäg gsy u i ha mit de Träne kämpft. I bi wieder zrügg is Stadion, ha Knights of Cydonia glost u mi hets fasch zerrisse. I mir inne hets vibriert wie no nie vorhär. I bi dert gstange, ha zueglost u der Schmärz ungerdrückt wo sech i mir inne het wöue breit mache. Vom Päscu hani bis a däm Tag woni ne am Märit wieder ha gseh nüt meh ghört. Ihm hani denn dWahrheit gseit. Der Ändu het eis u eis zämezeut u nid witer nachegfragt.

 

Der Päscu

Der Ändu isch irgendwie immer da gsy. Är isch i mim Läbe lang praktisch di einzigi Konstante gsy u i gloub das isches gsy woni a ihm am meischte gschetzt ha. Är het gäng zuemer ghaute, säubscht we mini Eutere mir der Rügge kehrt hei. Nid dass är immer mit mir iverstange gsy wär, aber är het über viles chönne drüber wägluege we ihm öpper wichtig isch gsy. Mir hets nie öppis usgmacht, dass är jünger isch gsy aus ig u je euter mer worde si desto weniger het mes gmerkt. Gnau gno isch är immer e chli ryfer gsy aus igs im gliche Auter gsy bi. I gloub är het o immer verstange werum i so bi wieni bi. Mir isch scho früeh viles verbotte worde. Mini Eutere si sehr sträng gsy, sträng konservativ. I ha nid dörfe rouke, Aukohou trinke, lang dusse blibe oder mi mit Meitli träffe. Der Ändu, obschon jünger aus ig, het praktisch kener Regle uferleit becho. Dämentsprächend het är chum Luscht gha irgendöppis azsteue, währenddäm mi aues dopplet greizt het. Für mi si Regle da gsy um broche zwärde u bsungers bi de Meitschi hani mi a nüt ghaute wo mini Eutere guet gheisse hätte. Dasi vo mim Vatter wäge däm einisch übu bi verschlage worde het mi i mim Verhaute nume no meh besterkt. Mit vierzähni hani mi gäge ihn noni chönne wehre. Speter hättis chönne u är het das o gwüsst. Woni id dLehr bi cho, hani zwar zersch e chli zkämpfe gha, aber di herti Arbeit i mim Lehrbetrieb het mir guet tah. Es paar Mau bini versuecht gsy, mi Vatter o einisch eso id Schranke zwyse. Wener sech i mini Aglägeheite het wöue imische oder wener mire Muetter dLevite gläse het wüu si nid so het wöue abstimme wie är, hätti ihm mängisch gärn eini ineghoue. Är isch guet binang gsy, aber är hätt ganz sicher der Chürzer zoge. Vilech isches aber grad deswäge gsy, dasis nie gmacht ha.

                DStimmig bi üs deheime isch sehr agspannt gsy u je euter dasi bi worde desto meh bi ig säuber derfür verantwortlech gsy. Mit sächzähni bini us der Chile usträtte u hami vo praktisch auem abgwändet wo mi Vatter Wärt druf gleit het. I bi absichtlech unorgendlech gsy, ha ständig angeri Fründinne gha, ha groukt u gsoffe u o gärn emau am Ässtisch gfluechet. Säubscht mini Muetter het sech gschämt. Einisch, u das isch schüsch nid ihri Art gsy, het si mir iz Gwüsse gredt. Lisli het si a mire Zimmertür klopfet, het der Chopf ine gstreckt u gfragt öb si dörf inecho. I ha nume stumm gnickt, mi uf mim Bett zrüggglähnt u mer e Tüte dräit. „Wieso machsch du das, Päsci?“ het si gfragt u isch näbe mir abghocket. „Was?“ hani gfragt ohni se azluege. „Du weisch wasi meine. Gäge was rebelliersch du genau?“ I ha ihre Blick uf mir gspürt u ihre schliesslech id Ouge gluegt. I ha lang nüt gseit u si het geduudig gwartet. „Gäge dHüchlerei,“ hani de gseit u mer der Joint azündet. „Äs isch nid a dir über ihn zrichte,“ het si gseit u ihri Hang uf mis Bei gleit. E chli het mi das gstört. „Är richtet aber o über mi u wär git ihm das Rächt?“ „Är isch di Vatter.“ „Ja und? Wosch mer itz säge, är meints nume guet?“ „Das hani nid gseit.“ Da het si mir der Joint us de Finger gno u ne töifi Zug gno. No nie vorhär het mi öpper so überrascht u i hase mit offenem Mu agstarrt. „Muesch nid meine, du sigsch e Revoluzzer, Päsci. O du hesch zRad nid nöi erfunge.“ Si het der Rouch usblase u mi aglächlet. U plötzlech isch da es Funkle i ihrne Ouge gsy woni ihre nie zuetrout hätt. „Was wosch du vo mir?“ hani gfragt. „Nid viu. I wott nume, dass du ne aständige Ma wirsch. U das beinhautet, dass du di benimmsch, egau was di Vatter dir fürnes Bispiu isch.“ Si het mir der Joint zrügg gäh, isch ufgstange u zur Tür gange. „Weiss är das?“ hani gfragt u ne töife Zug gno. „Sicher. Mir hei üs Ändi 60er Jahr kenneglehrt. Was meinsch wieso mir ghürate hei?“ I hami rächt lang nid bewegt. Obschon i ihrne Wort eigentlech ke Beachtig ha wöue schänke, bini doch sehr beidruckt gsy.

              I ha no lang über das Gspräch nachedänkt u mir isch klar worde, dasi mini Eutere eigentlech chum kennt ha. Plötzlech hani mi gfragt, wie si i mim Auter si gsy, was genau se zämegfüehrt het u werum si trotz auem immer zunenang ghaute hei. Antworte hani uf die Frage zwar nie becho, aber si hei viles relativiert. Plötzlech isch nüm aues eifach schwarz-wiss gsy u i ha o mi säuber afa hingerfrage. U mit der Zyt hani mi besseret. Em Aukohou hani witgehend abgschwört, groukt hani numeno Zigerette u i hami aständig usdrückt wes nötig isch gsy. Einzig dFroue hani nid chönne la sy. Die hei mi azoge wie nüt angers. I wott nid säge es sig e Sucht gsy, so hani das nie empfunde, aber öppis i mir het mi immer wieder atribe, het sech nach Anerchennig gsehnt u dFroue hei mir die gäh. Der Ändu het zwar mängisch der Chopf gschüttlet, het mer aber nie drigredt. Mängisch bini ganz schön dreischt gsy, ha o mit de Fründinne vo Kollege umegmacht. Natürlech hani gwüsst, dass me das nid macht, aber öppis i mir het eifach nid chönne widerstah. O mine eigete Fründinne hanis nie gschafft tröi zsy, egau wie gärn i se ha gha. Es het o nid grad ghuufe, dass dFroue schinbar uf Type wie mi abgfahre si. Es Klischee, ja, aber a jedem Klischee isch öppis dranne.

                Woni dJulä zerschte Mau gseh ha, hani instinktiv gspürt, dass si mir chönnt zum Verhängnis wärde. U das het mi ungloublech greizt. Öppis a ihre het mi ufere ganz nöie Äbeni agsproche. Bi ihre isches vo Afang ah um viu meh gange aus sexuelli Befridigung, obschon si mi o körperlech azoge het wie chum en angeri vorhär. Wosi mitem Rügge zu üs isch ufem Tisch gstange u ihre zT-Shirt isch über dSchuutere abe grütscht hani nüm chönne wägluege. Scho am nöchschte Tag bini ihre komplett verfaue gsy u wosi am Abe um zLagerfür tanzet isch hani nüm lenger chönne warte. I hase ar Hang gno u mit mir iz Zäut zoge. I bi hinger se häregstange u ha se ohni grossi Umschweife abzoge. DTatsach, dass si das het la gscheh no bevor mir üs küsst hei, het mir bestätiget, dass si angers isch gsy aus di meischte Froue. O ihri Tätowierig, wo sech vom Chrütz übere ganz Rügge bis zum Äcke ufe erstreckt, het mir denn ungemein imponiert. Mit eim Finger hase nachezeichnet u ha gspürt wie dJulä Hüenerhut het becho.

                Womer nachem Festival wieder si deheime gsy, heimer gmeinsam beschlosse zersch e chli Abstang znäh. Es isch e gueti Entscheidig gsy o wes mer schwär gfaue isch, ihre nid scho am nöchschte Tag wieder azlüte. I ha Zyt brucht zum mini Gedanke ordne. DNacht wo mir zäme mitem Ändu verbracht hei het scho denn amer gnagt. Woni der Julä denn id Ouge gluegt ha während är hinger ihre knöilet isch, hani gseh, dass si sech o ihm göffnet het. O we si zGägeteil bhouptet het, es isch aues angere aus emotionslos gsy. Dass si spöter hüfig am Ändu sini Nöchi gsuecht het, het mir das bestätiget. Je lenger i ha müesse mitaluege wie si mitenang gschäkeret hei desto meh hets i mir inne afa brönne. Iversucht, das weisi inzwüsche, isch öppis ganz und gar irrationaus. Es isch schier unmüglech dergäge azkämpfe u für mi isches denn uf aus ufe no nes völlig nöis Gfüuh gsy. I bi no nie vorhär iversüchtig gsy, wüui o nie vorhär Grund derzue ha gha.

                I beröies sehr, dasi der Ändu speter so zuegrichtet ha wie mi Vatter mi einisch. Hüt weisi, dass dJulä ihn zwar tatsächlech het wöue, dass är se aber abgwise het. I hätts eigentlech söue wüsse. Der Ändu isch immer viu aständiger gsy aus ig. I ha mi gschämt u wo dJulä u i üs trennt hei, hani der Kontakt o zu ihm abbroche. Är het mer no einisch, zwöi mau versuecht azlüte, aber i has nid über mi bracht ihm zrüggzlüte. I ha nume sehr schlächt dermit chönne umgah, dasi mim Vater schinbar ähnlecher bi gsy aus i gmeint ha. O weni praktisch keni vo sine Asichte teilt ha, het mir mi Usraschter zeigt, dass schinbar doch meh vo ihm uf mi abgfärbt het aus mir lieb isch gsy. U so isch es du nid lang gange u i bi wieder i mini aute Fahrwasser cho. I ha i dere Zyt hüfig eine übere Durscht trunke, mängisch o unger der Wuche, bi bir Arbeit nüm richtig bir Sach gsy, u hami vo eire belanglose Bekanntschaft i di nächschti gstürzt. U obschon is besser gwüsst ha, hani mir igredt, dass dJulä nume eini vo viune gsy sig, dass mini Gfüuh für si nid meh weder es Strohfür sige gsy, dass si mi nume azoge heig, wüu si e schöni Frou isch gsy wo mit ihrne Reize o nid gizet het. Froue wie si, hani mir gseit, gäbs no meh.

                U doch hets mi inne use kehrt woni dJulä übernes Jahr spöter am Muse Konzärt wieder gseh ha. Es isch ihri Lieblingsband gsy u vilech hani insgeheim ghofft, se dert zträffe. Wos de aber tatsächlech so isch gsy hani mine Ouge fasch nid trout. Si isch plötzlech us der Mängi uftoucht, ime churze Rock u mit verschwitzte Haar. Auem Aschin ah isch si elei dert gsy. Wosi mi gseh het, het si inneghaute, mi mit offenem Mu agstarrt. I bi froh gsy, dass dMusig eso lut isch gsy, i hätt nämlech nid chönne i Wort fasse, was denn i mir vorgange isch. Si isch für mi di puri Versuechig gsy. Ihri Wange hei glüit, ihre Atem isch schnäu gange, si isch wunderschön gsy. U i hase gliebt. I hase gliebt wie am erschte Tag. Nume bini denn ire angere Beziehig gsy. Woni dJulä gseh ha, hani se sofort wieder wöue, aber scho bim Gedanke dra hani es schlächts Gwüsse becho. Wosi mini Hang gno het, hani weder i no us gwüsst. Drum hani der Chopf eifach usgschaute us la drufab cho. Si het mi agluegt u i hase küsst. Scho gly hase us de Lüt use zoge u bi mit ihre ime müglechscht wit abglägne WC verschwunde. I bi rücksichtslos gsy, das muesi leider zuegäh. Egoistisch. I ha ihre wöue dWahrheit säge. Wo si mir när id Ouge gluegt het, hani ihre wöue säge, dasi se immer no gliebt ha, aber mit ere angere Frou bi zäme gsy. I has ihre wöue säge, ha zMu aber nid ufbracht. Wosi mi dert het la stah, hani gwüsst dasi müess gah. Weni uf se gwartet hätt, wäri vo ihre nümme los cho. U so bini wieder zrügg id Lüt, ha mire Fründin gschribe zum frage wo si sig u bi de nachem Konzärt mit ihre hei. Si het mir agmerkt, dass öppis nid gstumme het, het aber nid gfragt u i ha nüt gseit. Ersch paar Mönet spöter hani ihre vor Julä verzeut u mir hei üs trennt.

                Woni churz drufabe ufem Bäreplatz ar Julä ihrem Märitstang bi verbycho u se dert mitem Ändu zäme gseh ha, hani agnoh si sige ir Zwüschezyt es Paar worde. „Liebsch ne?“ hani dJulä gfragt. „Nei,“ het si gseit, „geng no nid. Das hani nie. Aber i bi schwanger.“ I ha zum Ändu übere gluegt u gnickt. „Vo dir,“ het dJulä agfüegt. U da isch mir mit eim Schlag bewusst worde, dasi denn am Konzärt nid nume rücksichtslos sondern ou verantwortigslos bi gsy. Si het mir aber ke Zyt gla zum antworte, isch ufgstange u wieder zum Ändu übere gange. I ha das aus Zeiche dütet, dass si vo mir nüt meh het wöue wüsse. U ne Zyt lang het si der Kontakt zu mir o nid gsuecht. Ersch churz vor der Geburt het si sech wieder bi mir gmuude. Wo zSiuvi du isch uf dWäut cho u i se zerscht mau gseh ha, hets mer schier zHärz zerrisse. Der Ändu het se ufem Arm gha u i ha gseh, dass är se bedingigslos gliebt het. Säubscht weni hätt wöue, hätti ihm dWahrheit nid chönne säge. Zersch hani mi i ihri Beziehig o gar nid wöue imische, ha versuecht ihm u der Julä usem Wäg zgah. Si het mi aber eifach nid losglah u i ha nid angers chönne aus immer wieder zuere zgah. Der Ändu het immer gwüsst, dass mir öppis zäme hei gha, o womer üs no heimlech troffe hei. Är het aber nie öppis gseit. Säubscht wo dJulä mi het afa zum zNacht ilade u mi när bi ihne deheime iz Schlafzimmer mitgno het, het der Ändu nüt dergliche tah. Einzig bim Siuvi ischer abwehrend gsy, het se nume ungärn mit mir elei gla. Bim Siuvi isch är iversuchtig gsy. Ihm säuber isches wahrschinlech gar nid bewusst gsy, aber är het versuecht zverhindere, dass si zu mir e richtigi Beziehig ufbout. Är isches o gsy, wo nid het wöue, dasi ihre Götti wär worde. Vilech heter Angscht gha, dasi irgendeinisch wieder chönnt verschwinde u het em Siuvi der Trennigsschmärz wöue erspare. Vilech heter aber o gspürt, dasi ha wöue blibe u het Angscht gha, dasi se ihm chönnt wägnäh. Das isch nie mini Absicht gsy, o wes mir mängisch schwärgfaue isch Abstang zhaute. Am schwierigschte isches gsy, we zSiuvi mitem Ändu oder der Julä het en Usernangersetzig gha oder wesi schüsch isch trurig gsy. Es isch nid hüfig vorcho, aber denn hani aube es schier unbändigs Bedürfnis verspürt, se id Arme znäh u se ztröschte. Inzwüsche isch es eifacher, o wes mängisch no weh tuet, dass si lieber uf dJulä oder ufe Ändu wartet statt mit mir zredä wese öppis bedrückt.

                  Geschter isch si sächsi worde u der Ändu het se am Abe bi üs deheime abghout. „Papi,“ het si grüeft wo si ne mitem Outo het ghöre vorfahre. Si het ihri Sache packt u isch dStäge abe grennt ohni mir tschüss zsäge. Wosi ihm ume Haus gfaue isch bini dobe am Schlafzimmerfänschter gstange u dJulä isch zuemer cho. „Es tuet mer leid,“ het si mir iz Ohr küschelet. „Was tuet der leid?“ hani gfragt, aber si het nüt gantwortet.

 

Teil II

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s